पद्मश्री पूनाराम निषाद के निधन म शोक श्रद्धांजलि

रायपुर, 13 फरवरी, 2017। संस्कृति विभाग, छत्तीसगढ शासन, महंत घासीदास स्मारक संग्रहालय मं आज छत्तीसगढ के मूर्धन्य लोक कलाकार पदमश्री पूनाराम निषाद के निधन म शोक श्रद्धांजलि देहे गीस। स्व. निषाद पाछू 60 बछर ले वेदमती शैली के पंडवानी गायक के रूप म जाने जात रहिस। उमन अंदाजन 60 बछर ले पंडवानी गायन करके छत्तीसगढ के ये प्रमुख लोककला गायन ल देश विदेश के गरिमामय मंच मन म प्रस्तुत करके ख्याति प्रदान करवाईन। उमन स्व. हबीब तनवीर के नवा थियेटर के नाटक मन म घलोक पंडवानी गाये रहिन। ओ मन अपन 75 साल के उमर म घलोक पंडवानी गायक के रूप म सक्रिय रहिन। उंखर निधन छत्तीसगढ़ भर नहीं भलुक पूरा देश म एक लोक गायक के अपूर्णीय क्षति होए हे।
ये शोक श्रद्धांजलि म विभाग के विभागाध्यक्ष श्री आशुतोष मिश्रा उप संचालक श्री राहुल सिंह, श्री अशोक तिवारी, श्री जी.एल. रायकवार सहायक संचालक श्री रावटे, सहायक संचालक मुक्ति बैस संग विभाग के जम्‍मो अधिकारी अउ कर्मचारी मन उपस्थित रहिन।